Arrazakeriaren kontrako eguna delako

March 18, 2016

25160795134_4e5db54782_z


Arrazakeria kontrako nazioarteko egunak, martxoak 21, solidarioagoa izanen den mundu bat eraikitzeko aukera eskaintzen digu urtero. Tamalez eta zorionez, aldaketarako aukera gure esku dago beti.

Ekintza eta jarrera arrazista eta xenofoboak, gero eta ohikoagoak dira azkenaldi honetan. Gogoz kontra etxetik atera, gatazketatik, biolentziatik edo miseria gorritik ihesi,  ederki gotortu den Europara iritsi nahian dabiltzanak gero eta gehiago dira, eta kopurua geldiezina eta goranzkoa da. Bidean tratu txarrak, tortura, bortxaketak, esplotazioa, bahiketak, tratukeriak, menpekotasuna jasaten dute eta gizaki asko, eta asko, hiltzen dira. Baina berdin duela dirudi. Haien bizitzak gutxiago balioko balute bezala. Nola da posible onartzea Grezian eta hainbat tokitan errefuxiatuekin gertatzen ari dena? ¨Zorioneko paradisua”. Zorionekoa? Paradisua? Norentzat? Non? Zein? Europa?

Bitartean, Europako gobernuek beste aldera begiratu eta mugak gotortzen dituzte, hainbat eta hainbat eskubide urratuz. Ahaztuko balute bezala duela ez denbora gehiegi ere, asko eta asko izan zirela Europatik Ameriketara migratzaile –arrazoi eta egoera berean–, joan izan zirenak.

Arrazakeriaren kontrako eguna delako eta pertsona guztiak berdinak garelako, atera gaitezen gizatasunik gabeko infernu honetatik

Eskuin muturreko talde erradikalak, eskrupulurik gabeko politikariak eta hainbat komunikabide, lan fina egiten ari dira gertaerak desitxuratzen, ustez, gure gaitz eta sufrimenduen errudun ihesi dabiltzanak, migratzaileak, beste kulturetakoak direla ikustarazten. Egia osoa ez da ia inon argitaratzen eta gehienetan sinistu egiten diegu.

Datorkiguna ez da xamurragoa! Errefuxiatuak jasotzearen kontra azaltzen den gobernuaren indarra Alemanian! Non geratzen dira:  libre ibiltzeko eskubidea, berdin tratatuak izatekoa, babesa jasotzekoa?Pertsona guztiak berdinak garelako, atera gaitezen zentzugabekeria honetatik. Orain!

Bego Zestau Baraibar. Immigrazio Zerbitzuko teknikaria.

Argazkia Fotomovimiento.org taldearena da eta lizentzia hauek ditu.


<< atzera