Ikasturte berriarekin batera, Sakanako Mintzakide taldeak martxan jarri dira. Euskara praktikatu nahi baduzu, baina ez badaukazu norekin egin, edo euskalduna izanda euskaraz bizitzeko aukera berrien bila bazabiltza, eman izena Sakanako Mintzakiden!
Praktikatuz ikasten da
Hizkuntzak erabiliz ikasten dira. Beraz, euskararen ikas-prozesua bizkortzeko eta aberasteko euskara praktikatu behar da. Batzuetan, ordea, ez da erraza izaten euskaltegitik kanpo euskaraz egitea edo ingurukoekin ditugun hizkuntza ohiturak aldatzea. Horretan laguntzen du Mintzakide egitasmoak.
Zer da Mintzakide?
Mintzakide euskaraz hitz egiteko ohitura dutenak ohiturarik (edo aukerarik) ez dutenekin elkartzen dituen egitasmoa da. Mintzakide taldeak txikiak dira. Taldean euskaraz ongi moldatzen den pertsona bat egoten da. Hura ez da irakaslea; beste taldekide bat da, eta ikasten ari direnei edo erraztasunik ez dutenei laguntzen die mintzapraktika programa honetan.
Taldeak, orokorrean, astean behin eta ordubetez elkartzen dira. Taldekideek erabakitzen dute noiz eta non elkartu: tabernan, paseoan, parkean… Gainera, ikasturtean zehar hainbat ekintza antolatzen dira taldeak elkarren artean ezagutzeko eta Sakanako euskaldunak saretzeko.
Sakanako mintza-taldeak
Sakanako Mintzakide programa Sakanako Mankomunitateko Euskara Zerbitzuak finantzatzen du, eta Sakanako AEK-k koordinatzen du.
Gaur gaurkoan, 12 mintza-talde daude Sakanan. Ordu eta leku hauetan elkartzen dira:
- Ziordia: ostiraletan, 16:00etan, liburutegian.
- Altsasu: astelehenetan, 10:00etan, Gure Etxean.
- Altsasu: astelehenetan, 16:00etan, Gautxori tabernan.
- Altsasu: ostegunetan (bi astean behin), 20:00etan, Lezea tabernan.
- Altsasu: ostiraletan, 9:00etan, Kaixo tabernan.
- Etxarri Aranatz: ostiraletan, 19:00etan, Xapatero tabernan.
- Arbizu: asteazkenetan, 18:00etan, kiroldegiko tabernan.
- Lakuntza: asteazkenetan, 18:30ean, jubilatuen elkartean.
- Uharte Arakil: ostiraletan, 17:30ean, Amaia okindegi kafetegian.
- Irurtzun: asteartetan, 18:00etan, Iratxo elkartean.
- Irurtzun: ostegunetan, 9.00etan, Pikuxarren.
- Irurtzun: ostiraletan, 19:00etan, Pikuxarren.
Talde horietan parte hartu nahi duzu? Beste mintza-talde bat sortu nahi duzu? Animatu eta eman izena Mintzakiden!
Eman izena!
600 482 024 telefonoan.