Sakanako Mankomunitatearen egoitzan atzo egin zen ekitaldi batean, Pintxo Jasangarrien lehen lehiaketaren irabazleak iragarri ziren.

Lehiaketak tokiko gastronomiako sormen lan gozo eta jasangarrienak aitortzea eta saritzea izan zuen helburu. Aitor Zubieta, Joseba Ezkurdia eta Joanes Bakaikoa pilotari eta pilotari ohiek osatu zuten epaimahaia, eta pintxo bakoitza zaporean, originaltasunean eta aurkezpenean oinarrituta ebaluatu zuten.

Pintxoak erabili gabe bota ohi diren produktuen zatiekin osatuta zeuden. Aurkeztu ziren pintxoetan erabilitako osagaietako batzuk honako hauek izan ziren: ogi gogorra, porruaren zati berdea, bakailao-azala eta hainbat fruta eta barazki (patata, tipula, azenarioa, laranja, limoia eta erremolatxa) azalarekin eta guzti.

Hauek izan dira irabazleak:

• Lehen saria: Arkangoa Taberna (Altsasu) Hirumugako Akerra pintxoarekin.

• Bigarren saria: Koxko taberna (Bakaiku) Hiru Haitz pintxoarekin.

• Hirugarren saria: Juanito taberna (Arbizu) Torrija gazi iraunkorra pintxoarekin.

Lehiaketak erakutsi du gastronomia eta jasangarritasuna eskutik joan daitezkeela, hondakinen prebentzioan laguntzen duten plater goxoak sortuz.

Sakanako Mankomunitateak eskerrak eman dizkie parte hartu duten guztiei, euren gogo eta sormenagatik.